荷蘭醬碎蛋煙肉卷 (Hollandaise Breakfast Stick) ($21)
有晚去星巴克唔知食乜好，又冇乜新甜品想再食多次，取而待之就唯有揀包類啦，雖然我係唔鍾意歎啡食包的.....但冇都冇法囉..。
本想食＜意大利香腸烤卷＞，因為記得佢卷住好多黑椒粒同芥末醬，烤燶Ｄ係好食嘅，但去到竟然冇咗喎....
原來出咗呢條新的＜荷蘭醬碎蛋煙肉卷＞，可能係咁而將＜意大利香腸烤卷＞暫停一陣先啦，之後會出返嘅，好啦，睇佢個包都係意式麵包，表面有好多香草都幾有興趣食吓。
切開呢舊意式麵包都幾好食，面層脆脆裡面幾煙韌，塊煙肉都幾肥，咸咸的但唔脆，香口Ｄ一定會更襯呢個包啫，裡面釀入好多炒雞蛋，都幾嫩滑，相信係因混和了好多蛋黃醬所以更加嫩滑，不過就會覺得更肥，因為荷蘭醬即係蛋黃醬，由蛋黃海鹽牛油檸檬汁混和出來.....其實食食吓都有點膩。

意式聖誕橙香麵包 (Panettone) ($16)
Panettone是意大利語「大麵包」的意思，係意大利米蘭的糕點，通常係聖誕節享用的，今年香港Starbucks應該係第一次推出啩？
傳統嘅意大利Panettone係用蛋黃、鹽、酵母、麵粉、糖、奶油、柑香酒、檸檬皮及葡萄乾等原料作成，所以睇佢個樣似蛋糕，其實即係一個甜麵包囉。
我都係第一次食Panettone，職員問翻唔翻熱？當然好啦，但點解唔將包Panettone紙除開才入焗爐叮？因本在頂層的糖霜經翻熱後溶化了，更黐著包住Panettone的紙，真係食紙咁食......。
麵團都幾鬆軟，的確好有麵包味......，麵包冇橙香亦唔甜，又話係甜麵包？提子乾有好多粒，但只食到２小夥橙果脯而已。
呢個Panettone比出面如Citysuper賣的Size細好多，出面賣開的Size多數係For一家人食嘅，而呢個雖然For一個人食唔係好大舊，但食落其實都幾寡，因為味道好單調，第一次食完後令我印象麻麻，原來Panettone係咁架咋.....？

冧酒提子麵包布丁 (配雲呢嗱醬) Rum Raisin Bread Pudding with Vanilla Sauce ($30)
再來了再來了，2011年頭第一次推出後要等到年尾先再出現，都係For冬天架喇，但的確好味喎，最緊要叫職員將麵包布丁烘焗得燶Ｄ，一定要將雲呢嗱醬分開上喎，其實可以連雲呢嗱醬都唔要，因為會好膩的，反而可以加Ｄ肉桂粉一齊食，好味。
雖然今次食嘅同上年頭食的一樣係冇冧酒味味，但蛋漿將法式牛油軟包浸透，翻熱後面層有點燶帶有杏仁片一齊食係好味嘅，今次蛋漿更冇上年食的咁甜添，係面層的糖漿甜啫，裡面更有好多粒好甜提子乾(冇冧酒味)，雖然係幾肥下，不過一年才食２、３次都唔錯丫。