真真好耐冇見大師姐喇！！開頭都唔知食乜好？我唔想佢地又遷就我而捺日本菜，所以一早講明唔好揀日本菜咯....最後想揀中菜，雖然我唔鍾意食中菜，不過大家都會有啖好食，我起碼都會有個雜菜煲丫，一於食中菜啦。
最後由師姐揀咗去Mega Box上面的「肇順名匯河鮮專門店」。
好友７點前已經上到去搵位，我都係７點正上到去喇，係德福行過去其實都好快，好過等穿梭巴士啦，之後師姐一家都係７點４到喇。
好友一早已經搵定我要食嘅＜海味雜菜煲＞，其餘食乜就等佢地揀咯...１０分鐘後...好快就揀好喇。

① 雙腐銀杏浸勝瓜 ($88)
② 薑蔥爆大魚煲 ($78)
③ 肇順拼盆 (順德煎釀尖椒、生煎蓮藕餅、順德杏片煎魚餅)
④ 海味雜菜煲 ($65)
⑤ 銅盤干蔥焗走地雞半隻 ($98)
⑥ 白飯 x 4
⑦ 藍帶啤酒 x 3 ($15)
⑧ 最後有西瓜一碟送。　

①號佳麗的勝瓜被白雪雪嘅魚湯浸完食落都唔鯹，因為本身唔飲魚湯呢，都怕會鯹，但食落都幾清甜喎，不過最好食都係銀杏，煙煙韌韌正。
②號佳麗的薑蔥超好味！唔知係咪因我唔識食魚嘅關係，食落魚肉又鮮又滑嘅，不過冇魚味喎？薑蔥味太強之故？
③號佳麗我冇食呀，見到都唔多想食.......
④號佳麗的湯底好味，唔味精唔咸仲鮮甜添，有好多魷魚同大蝦乾而唔係蝦米喎(雖然我鍾意食蝦米多Ｄ)，好食。還有菜芯、西蘭花、唐生菜和大量粉絲，都幾大煲，都幾抵食。　
⑤號佳麗的雞，一個字「滑」！！洋蔥都好食。

其實總括來講呢，味道、環境與服務都還好，但最後知道埋單要６百幾銀，唔算抵食。
只係可能好多餸菜都用上銅盤、鐵板上菜，唔食得都睇得同聽得，因為上菜時聽到吱吱聲熱辣辣，係感觀上先享受了，對味道就次要咗囉....。
不過呢晚食都係其次，主要係可以同好耐冇見的師姐聚聚，已經覺得好好架喇。