又係完咗崇拜搵飯食嘅時候，落到花園街，其實都無咩心水，同個弟兄見到依間「澳門大豐新翠苑餐廳 」好似幾旺，即管走入去一試。鋪內呈長形，地方有啲淺窄，相反樓底幾高。因為都係填飽肚食餐晏，食完就鬆人，所以，唔使點睇餐牌，唔使多諗，就快餐啦，A-H共8款，都係$32-34，包無味精靚湯及咖啡或茶，真係比去連鎖快餐店仲抵食，怪唔之得幾多人幫襯！

朋友D要咖喱豬扒飯，小弟就要個醬燒金沙骨飯，大家都飲中湯，因為係蓮耦鱆魚煲唐排，若要西湯只不過係忌廉湯，感覺老火中湯有份量啲。

咖喱豬扒飯 $33
一如往常港式咖喱飯，咖喱豬扒同飯分開上，但勢估唔到兜咖喱豬扒多到滿，雖然下底墊咗少少薯仔，不過豬扒我估都有成兩大塊，仲切條方便食。因為夠多豬扒，我就好唔客氣拮咗一件試一試，質素如何，掂喎！豬扒鬆軟，肉質腍滑，而咖喱少少辛辣，但頗香，而且唔會水汪汪咁稀，撈飯佳品。杯凍奶茶，朋友話唔錯，滑就唔滑架喇，但幾夠茶香！

醬燒金沙骨飯 $33
點依個飯，源於好奇睇吓佢咩叫做醬燒金沙骨，嘩！嚟到同自己心中所想有好大反差，當然只係講緊個買相啫。腦海裡嘅金沙骨通常都係一條條，眼前所見就一粒粒似排骨，醬燒諗住個樣會乾身啲，似燒烤類，實情落獻打晒醬汁咁款。幸好，味道又幾好嘅，味道酸酸甜甜，醬汁幾濃郁，排骨唔韌一咬離骨。不過，與其叫「醬燒金沙骨」，不如叫番做「糖醋排骨」貼切啲啫，因為無論個樣，抑或味道都真係似糖醋排骨多啲。

凍咖啡
我本來要熱咖啡嘅，個阿姐猛咁叫我試吓佢哋啲凍咖啡，係招牌嚟，較為特別啲架，個阿姐硬銷到咁，我又姑且信佢一次。凍咖啡嚟到，比坊間，又確係有少少唔同。其實唔係咩泣鬼神咁特別，只係晌咖啡面再灑咗撮咖啡粉，飲時先搞杯底嘅冰，等咖啡夠凍，飲咗一陣，啲冰溶多啲，先至大搞，令杯面咖啡粉都溶入埋，保持濃度，感覺咖啡味就唔會稀咗。確實，咁樣又真係有啲效果，唔使好似「灰狗」搞咩茶味冰粒咁煩，又要收得你貴、服務又差喎！
 

你話佢啲嘢好正又唔算，比OK又高啲，真係要俾分，就「剔」與「OK」之間。