一大棚教會友人行山，路線係元荃古道，由荃灣出發行到去深井，條路唔難行，有幾段望住成個荃灣區、青馬大橋……，景觀幾正，到達之後食埋午餐先散水，不過，有部分人唔係行開山，令到整隊人嘅前進速度比預期慢，所以就由原本食晏變咗飲下午茶，都無所謂嘅，係捱吓肚餓啫！

深井有好多食燒鵝名店，不過，揀咗「嘉韻」係因為佢啲燒鵝都唔錯，而且，佢本身係間酒樓，可以晌度叫多啲點心食，選擇多啲，難怪我哋大概3:00pm去到，都仲有好多茶客嚟嘆茶食點心。大家都實在太肚餓，落單叫半隻燒鵝先（$188），然後先再慢慢剔點心。

燒鵝
一入門口已見到專整燒鵝個廚房，大大座「太空爐」，燒鵝不停做，不停有新鮮靚燒鵝出，所以，我哋碟燒鵝一上枱，甘香撲鼻，油潤光澤，皮脆肉嫩相信都係基本喇，而且隻鵝唔太肥，唔使擔心一口咬落成層皮下脂肪大肥膏。仲有，鵝油鵝汁亦係撈飯佳品，雖然可能膽固醇會高啲，但少吃多滋味，偶爾食啲，無事嘅！

點心
因為依餐有啲專誠嚟食燒鵝，點心變得有啲其次，所以，都係各人隨心點，剔吓剔吓結果都叫咗成枱嘢，有香煎蝦米腸、特色流沙包、煎釀虎皮尖椒、蟹籽燒賣皇、泰式酸辣鳳爪、海蜇燻蹄、胡椒豬肚、特長春卷、薑蔥牛柏葉、千層馬拉糕、嘉韻蝦餃皇、潮州蒸粉粿、順德鯪魚球、鮮竹牛肉球、醬汁蒸鳳爪，加多碟乾燒伊麵墊底。基本上，無論點心抑或小食，都唔算有咩驚喜，但師傅手功紮實，質素穩當，無咩差池。好似特色流沙包，鹹蛋黃流沙餡，甘香滑溜；泰式酸辣鳳爪，酸辣醒胃，鳳爪爽彈；胡椒豬肚，豬肚無燥味，胡椒香辣；乾燒伊麵也炒得乾身，唔會一碟都係油。一大班人，傾吓食吓，食到人哋熄燈落場，我哋先捨得走，哈哈！