好少出入紅磡，晌紅磡嘅食評少之又少，過親嚟都唔係好嘢，今次都唔例外，為咗老友嗲哋嘅白事，所以先至收工跟幾個朋友過嚟走個轉。由於此次喪事以道教儀式進行，所以，都唔多久留，主要都係慰問吓老友，睇吓有咩可以幫吓手。

收工收得晏，逗留晌殯儀館都係半個鐘左右，完埋件事都差唔多8:30pm，梗係食埋飯先返屋企。三幾個老友，都費事周圍搵去邊度食，見對面街有間錦成牛雜粉麵茶餐廳，雖然望落裡面好似昏昏暗暗，但志在食完就鬆人，無乜再點諗，走入去坐低就睇吓有咩食。環境格局比較舊式，因地方細細，印象中好似無卡位，全場放有5張小圓枱，都有幾枱客，原來都有好多學生哥（理大學生）嚟食飯。

佢既係賣粉麵，又係茶餐廳。既然以「牛雜」二字為店舖招牌，就食牛雜啦。枱面上嘅餐牌，有經濟粉麵餐，各款粉麵都係賣$21，仲送可口可樂；不過，佢仲有個餐牌，係經濟客飯，亦只不過$22，加杯熱飲都係加多$5，就決定要一客原汁牛雜飯，配熱奶茶。

原汁牛雜飯 $22
牛雜有牛肚、牛肝、牛膀，加多炷生菜，飯底加咗腩汁。牛雜都幾入味，鹵水芳香，牛肚煙韌，牛肝粉嫩，牛膀爽口，雖然唔係話好食到不得了，但以$22嚟講，算有番咁上下喇。依家物價都係咁升啦，$22一碟碟頭飯都已經難得架喇！加多$5仲多杯奶茶，都OK喎，抵過去快餐店啦！