呢晚我地一行六人來到家傳滬曉為２位好朋友慶祝生日，一如以往我地早收工的去咗睇場戲先，散場後再去到家傳滬曉Join埋一齊食飯。
係當日我先Book咗６位2130，職員帶我地入門口入少少的位置，不過一睇就知呢張係４人枱啦，但我地係６位喎，剩係我地４個坐係到等緊另外２個朋友來都覺得迫喇，齊人咁點呀？同埋呢晚都冇乜客，仲有好多枱冇客喎。
之後我地真係齊人喇，揀緊食乜時已經覺得坐得好唔舒服喇，咪問職員可唔可以調位呢？
之後職員才帶我地行到最入的位置，既光猛又寬闊，圓枱好得多啦，點解明明有圓枱又唔畀我地坐呢？之後我地共叫了１５款菜，剩係一半上枱都唔夠位啦，如果仲係坐返果張４人枱嘅話，Ｄ餸放係邊呀？地下呀？一成不變不是好事囉。

雖然我地６個人叫咗１５款菜，不過每碟份量實在很少很少，以每碟幾十蚊的價錢，計分量同味道唻講，的確唔抵食，更感偏貴了，食完好似冇食過野咁。

以下係我地點選的１５款菜：﹣
呢餐合共＄６８０

01）鮮肉窩貼(４件/宵夜)
油唔多，乾身，皮薄，不過味道一般。

02）口水雞
第一次食口水雞，麻辣味唔重，雞肉好滑。

03）蒜泥白切黑䐁肉
唔知係咪真的是黑䐁肉關係呢？䐁肉很軟很腍，蒜泥帶點红油幾好味。

04）上海粗炒
好油呀！點解上海粗炒去到邊到食都同樣咁多油呢...？麵條少許煙韌，味道其實咪又係豉油炒麵味啫。

05）七色豆腐
好奇怪的七色豆腐，配料勁少冇調味，，同Menu中的圖片落差太多了吧！？起碼冇咗一倍份量，究竟佢想點呢？味道如何唔使多講啦，切切切完擺落碟之嘛。

06）干扁四季豆
四季豆爽脆，有咸肉味，幾好。

07）上海小籠包 x 2
皮很薄，湯汁非常多，不太肥膩，唔錯。

08）芥茉手拍青瓜
好細碟，好彩青瓜好清爽，脆脆的，好夠芥茉味，很不錯。

09）雲腿娃娃菜
好清甜，又似用上魚湯，好味。

10）紅油抄手
其實即係四川人對餛飩嘅稱呼，只係冇湯而用辣椒油、豉油香油等撈埋，但呢個唔香，皮就幾薄。

11）上海春卷
扁平上海春卷 ，餡料有好多蔬菜，都幾脆嘅，冇乜特別好唔好食。

12）搖柱蝦仁蛋白炒飯
無乜味道，唔講都唔知係蛋白炒飯？我仲問係咪楊洲炒飯添，總之冇特別，只係其他野太細碟先叫返個飯塞住個肚而已。

13）招牌生煎包
的確係好的式，味道一般，包皮都幾厚，肉餡不算多汁又唔熱，最靚只係面頭上的黑芝麻囉。

14）豆沙窩餅
餅樣脆脆的，豆沙少甜，剛剛好。

15）擂沙湯丸
第一次食，原來黏係上面嘅係黃豆汾，塊皮似我幾鍾意食嘅糯米糍，但好甜，勝在不粘牙不粘口。