＜碎朱古力鬆餅＞ ($16)
其實我係好掛住＜榛子碎朱古力鬆餅＞，但又冇咗我先揀食呢個＜碎朱古力鬆餅＞咋......原來呢個冇咗榛子碎嘅鬆餅係咁膩嘅
同埋鬆餅裡面的碎朱古力餡都唔係有好多，食多一點點牛油Muffin都覺好飽喇！！！不過都係好食嘅，係肥Ｄ囉....。

＜肉醬蕃茄烤卷＞($21)
冇咗＜意大利香腸烤卷＞後，取而代之係呢條＜肉醬蕃茄烤卷＞，麵包是相同的，面層一樣有芝士，不過呢個說係芝士碎面唔係芝士條，同樣有點黑椒粒，不過少好多。
切開麵包很煙韌，睇落好似脆面原來又唔係，裡面的肉醬似肉餅多Ｄ，不過食落都似係肉醬嘅，只是蕃茄味唔出，味道一般。

＜印式香辣烤雞卷($38)＞
烤洋蔥算多幾好味、牛油生菜好新鮮份量亦多，加上雞胸肉微辣鮮嫩，卷皮烤得熱熱微燶都算唔錯，不過裡面的印式醬汁好似係沙律醬，唔似我去印度時食嘅醬料，有Ｄ怪怪地和有少少膩，不過總算幾好食，只係餡料偏少啫，塊皮就好大塊喇。

＜暖心蘋果脆批(配雲呢嗱醬)($28)＞
上年１０月第一次推出嘅脆批，今年９月再度推出，我見到佢再出就梗係好開心啦，因為我鍾意頂層果Ｄ燕麥嘛，叫職員翻熱叮燶Ｄ脆口Ｄ就真係超好食！
不過今次放係頂層的紅莓乾比上次少咗好多lu，不過燕麥上面的牛油脆粒相反就多返Ｄ幾香口，雲呢嗱醬放置係批的側邊，但份量都少，不過對我唻講不成問題，因為我唔要醬嘅，但如果你叫左呢個批而都係唔食醬的話，還是預先叫職員另上，因為我試過職員會倒落批面翻叮架，甜到呢。
而批餡依然好味，蘋果茸份量多，不過今年與上年唔同，今年嘅蘋果茸係偏於批裡的一邊嘅，另一邊都係蛋奶餡？其實仍感偏甜唔夠酸，不過你可以加Ｄ肉桂粉，會又香更好食o番。