因為少食住家飯, 所以這裡成為我的間中飯堂, 食一頓有住家feel的三餸飯.

麵豉梅菜蒸魚有二件魚, 要小心食, 因為有幼骨, 碟底墊以薄豆腐, 麵豉及梅菜很惹味, 至啱配白飯吃, 不過碟底油頗多.

西芹雞柳的雞肉只得一小片, 西芹不過不失.

豆角排骨只得一粒排骨, 豆角是可以的.

北杏南瓜豬骨湯, 可能南瓜已經與水溶為一, 只見橙色的湯, 有少許甜味, 加上幾粒北杏, 味道是可以的.

大半盅的蒸飯, 飯粒算分明, 只吃剩少許.

今日食客不算多, 可以找較隱蔽的位坐, 吃得較為自在. 見隔鄰的食店賣著相近的食物, 若有機會都想去試試.
 

這小店是我近來飯堂之一,  時間早, 三餸飯選擇有蒸魚, 蒸雞及蒸排骨, 其他餸有麻婆豆腐, 菜心, 煎釀三寶, 較後時間還有冬瓜火腩.

蒸魚共二件, 其中一件是魚尾部份, 肉較少, 碟底有一片薄豆腐, 以麵豉梅菜調味, 感覺美味.

煎釀二寶,  有一大大件釀豆腐, 三件釀青椒, 魚肉都不算少, 亦夠味, 不過始終是炸物, 食後喉嚨有點唔舒服.

菜心少了菜的甜味, 但仍是可以的.

菜乾紅蘿白豬骨湯,  沒有太多的湯渣, 味道不過不失.

其實可以買外賣, 不過不想白飯浸在餸汁中, 在店旁食就可以飯餸分開, 加上懶得拎返屋企, 所以選擇食完先至走.
 

今日想起這裡的住家feel味道, 又來坐街邊食餐飯, 仍然是食我喜愛的三餸飯 (一蒸餸, 加二個菜).

冬菇蒸雞有六件雞, 不嚡, 夠肉味, 冬菇有一隻, 幾厚肉, 滿意.
翠肉瓜炒肉片, 翠肉瓜稍腍, 肉片不多, 味道不過不失.
涼肉排骨, 涼瓜厚切, 有口感, 排骨不多, 味道是可以的.
今日送的例湯是南北杏紅蘿蔔豬骨湯, 味道是可以的.

正因為價錢相宜, 感覺是老老實實, 所以有不少人樂於光顧.
順帶一提, 這裡是逢星期日休息的. 支持小店經營, 加油.
 

此食店只有細細舖位, 主要是外賣, 但門前亦放有幾張枱. 最近路經此店, 發現原來有三餸飯供應,  今日就來試試.

白飯是原盅蒸飯, 有大半盅, 雖然不是很有飯味, 但算是飯粒分明, 加上枱面放了甜豉油, 很有食蒸飯的風味.

蒸鳯爪排骨是以細不銹鋼碟盛著, 是原碟蒸出來的, 用豉椒烹調, 排骨有八粒, 夠腍夠入味, 鳳爪有二件, 但味道就較淡. 蒸餸與飯分開, 雖然少了肉汁滲入飯內的美味, 但亦可以減少肥膩, 我喜歡.

炒菜心雖然簡簡單單, 沒有其他配料, 可能是合時菜, 所以很有菜的甜味.

苦瓜排骨是用豉椒烹調, 排骨有二粒, 食物很腍, 很入味.
菜心及苦瓜兩個餸是盛在同一橢圓形細膠碟內.

例湯是紅蘿白青蘿白豬骨湯, 味道是可以的.

其實還有炒節瓜絲, 蒸臘腸排骨, 蒸咸蛋肉餅及蒸雞等, 有機會會再試. 若果不想喝例湯, 亦可以飲豆漿的.

總括而言, 在行人路食飯當然不會舒適及衛生, 但食物實在沒有將貨就價, 份量和質素絶不欺客, 味道又有屋企feel, 值得再光顧.