今次揀呢間都係到當晚２選１揀出來嘅，我就諗最緊要有靚草食又想有甜品當生日蛋糕嘅....
最後揀Pizza Express係因為佢有好多沙律選擇，本身我又幾鍾意食飽，聽說呢間的麵包好食喎，咁都好合乎我要求，所以好友先Book呢間，如果冇位才去第二間囉。
都知Pizza Express係好多人食架喇，所以都諗到Book咗位準時都未必有得入座，我地Book７點，都要1915先可入座，再揀野食到上第一道菜已經係1934喇，最後我都慢慢食到2050先埋單走人。

每上一道菜當然影相先啦，再食少少...又等下一道菜，直到上尾２道菜先來一張大合影後先食咋...如果唔係都唔會有張豐富野食嘅相啦..哈哈哈。

係上菜期間都有個小插曲，就係上完②後，Waiter再上我期待的沙律，係我影完相後再望真Ｄ...o依....冇山羊芝士喎？唔係我地要嘅沙律唻喎，原來佢入錯咗＜雞肉凱撒沙律＞，係我最唔鍾意嘅沙律之一囉，梗係叫佢換返＜雞肉沙律＞畀我啦！！
到上o岩個沙律上枱，更覺得我地叫的雞肉沙律好過凱撒沙律好多呀，起碼靚仔同豐富好多啦。

呢餐真係食得好飽仲收到好多禮物超豐富的一晚，雖然都係冇生日小Cake，不過已經好開心喇！！！

① 紅椒湯 Soup Red Pepper (是日餐湯Soup of the Day) $49
我唔叫湯飲，呢知係好友的，佢話酸咗Ｄ，但我飲過吓又唔覺喎，但又唔辣...一般啦，同價錢唔成正比咯。

② 薄切三文魚 (Carpaccio di Salmone Affumicato) $62
都話聽說呢間的麵包好食所以我先來食餐，見呢碟只有幾塊的三文魚側邊已經伴有６個麵包球，麵包球外頭烘得香脆，裡面質感QQ的，但就冇乜味，屬一般而已。
三文魚肉質ＯＫ，但淡而無味噃，只吃到橄欖油，檸檬汁同刁草味，一般啦。

③ 雞肉沙律 (Pollo) $109
冇諗過份量會咁大(其實以價錢來講都應該唔少野嘅)，不過當上枱時都真係好Surprised，好勁！
揀呢個沙律最大因數係想食羊奶芝士，因為自去完土耳其餐餐都食羊奶芝士後就鍾意食咗(本身我唔喜歡食芝士)，見到呢個有羊奶芝士又多草所以揀佢喇。
雞肉好嫩、咸咸的羊奶芝士好味，除此之外仲有烤燈籠椒、青菜、車厘茄、橄欖、烘麵包條同沙律醬，太豐富喇，抵！

④ 山羊芝士薄餅 (Caprina) $122
其實我唔鍾意食Pizza嘅，鍾意嘅只係Pizza的脆脆餅皮邊，朋友想食Pizza雖然得佢一個食，咁我都可以食少少嘅，所以就叫咗呢個山羊芝士薄餅，我都知因為我鍾意食咗山羊芝士，所以佢先就我揀呢款，面上除了羊奶芝士還有馬蘇里拉芝士，夾埋都幾好食，同埋乾蕃茄都好味呀！！！

呢餐最後連10% Service Charge Total $376.2，我就覺得算抵食，都讚！！